नेपालगंज मिडिया सेन्टर संचार माध्यमसे समुदायक मनैन सचेत करैना ओ हुकन्हक समस्याहन राष्ट्रिय अन्तराष्ट्रिय स्तरसम उजागर कैख समस्यक समाधान कर्नाम सहयोग पुगैना उद्देश्यले स्थापना हुइल संस्था हो ।

सञ्चार प्रबिधिक माध्यमसे विविध अवस्थाम रहल समुदायक मनै सचेत होख आपन समस्याहन संचार माध्यमसे उठैना सफल करैना याकर मुख्य लक्ष्य
हुइटस् ।

उद्येश्य

१. आदिवासी जनजाती एवं पाछ पारगैल समुदायकलाग सुन्ना ओ हेर्ना सामग्री तयार पार्ख गाउँघरक मनैन सचेत करैनाम सहयोग पुगैना ।

२. आधुनिक सुचना प्रबिधिम थारु एवं पाछ परल बर्ग समुदायक पहुँचम सहयोग कर्ना ।

३. संचारक माध्यमसे थारु भाषा संस्कृतिक संरक्षण ओ सर्म्बर्द्धन कर्ना ।

नेपालगञ्ज मिडिया सेन्टर पाछ परल बर्ग, समुदाय तथा जातजातिक लाग् श्रव्य दृष्य सामग्री उत्पादन कर्ना संस्था हो । गाउँ घरम बैठना मनैन सूचना प्रबाह कर्ना लिरौसी ओ सहज माध्यम रेडियो बनल बा । नेपालगञ्ज मिडिया सेन्टर गाउघरम जाख लौव लौव सूचना खोज्ख गाउँघर सक्कु मनैन् सही सुचना पुगैना ओ डुइटर्फी सूचना प्रबाह कर्ना प्रयास कलैबा ।

नेपालगंज मिडिया सेन्टर २०५९ सालम स्थापना होख घरेलु तथा साना उद्योग बिभागमा दर्ता हुइल बा । इ संस्था आपन स्थापना हुइल समयमसे नेपाली ओ अवधी भाषाम मेह्रमेह्रीक कार्यक्रम उत्पादन कर्टी आइल बा । जौन मध्ये नेपाली भाषाम कचहरी १, कचहरी २ सुन्ना पत्रिका तयार कैसेक्ल बा । ओस्टहेंक नेपाली भाषाम जागृती रेडियो कार्यक्रम फे उत्पादन कैसेक्ल बा । थारु भाषक् कार्यक्रम्म ख्याल, अँख्वा, हमार सैडान, निसराउ, जुट्हृयाला तयार कैसेक्ल बा । हाल इ मिडिया सेन्टर हमार गीत हमार संस्कृति, लौव जुनी, कचेह्री रेडियो कार्यक्रम उत्पादन कर्टी बा । जौन कार्यक्रम रेडियो बागेश्वरी एफएममसे प्रसारण हुइठा । इ सेन्टरमसे अवधी भाषक् 'ज्ञानय शक्ति होय', 'जिवनकेर जिम्मेवारी' ओ 'चौपाल' कार्यक्रमफे तयार कर सेक्ल बा ।

नेपालगंज मिडिया सेन्टर अम्हीसम् पानोस साउथ एसिया, एम. एस. नेपाल, एक्सनएड नेपाल, कम्युनिकेशन कर्नर, बेस, एफ. एन. सी., नेपाल परिवार स्वास्थ्य कार्यक्रम संस्था हुँकन्से काम कैसेक्ल बा । चार बर्ष दौरानम ५०० से ढीउर रेडियो कार्यक्रम २०० से ढीउर रेडियो नाटक ओ मेह्रमेह्रीक स्पट, जिंगल, सामाजिक संदेश फे उत्पादन कैसेक्ल बा ।